Alegiak - Leon Tolstoi

Zigor zorrotza

Mujik batek, azoka batetara joan, eta, haragia erosi zuen; baina, harakinak pisuz eta kalitatez iruzur egin zion.

Bat-batean, saltzailearen aurka zipli-zapla ekin zion.

Tsarrak, handik igarotzen zelarik, ikusi zuen eta galdetu zion:

— Zer dela-eta horrelako irainak?

Mujikak erantzun zion:

— Maltzurki hartu naute: hiru libra haragi on ordaindu ditut, eta, harakinak bi besterik ez dizkit eman, eta, txarrak gainera.

Tsarrak esan zion:

— Goazen azokara eta ezagutaraz iezadazu iruzur egin dizuna.

Mujikak bere subiranoak agintzen ziona egin zuen.

Tsarrak haragia pisarazi zuen, eta, egiazki, pisua ez zen legezkoa.

Orduan, tsarrak galdetu zion:

— Nolako zigorra ezarri nahi diozu harakinari?

Mujikak, mendekuz beterik, erantzun zion:

— Egizu, falta zaidan haragi libra hori ebaki diezaiotela bere sorbaldatik.

Tsarrak ihardetsi zion:

— Bai, ondo dago. Tori aizto hau, eta, ebaki iezaiozu sorbaldatik libra bat haragi.

Baina, ahalegin zaitez pisua zehatz-zehatza izan dadin; gehixeago edo gutxiago ebakiko bazenio, zu zeu izango zinateke zigortua.

Mujikak ez zuen tutik ere esan, eta alde egin zuen.