OSKORRIKO ARRAGOAK

Garaizarko itsuari

ikusten duzu arratsaldean

eguzkia unaturik abailtzen denean

suak oro gorritzen duela ortzemugan

hara han burdina lurra eta ortzea

goritzen direneako labe handiak

hara han eguzkiaren ganbara

hara han argiaren habia epela

hara han dizdiraren ohantzea

han non oro den urregorrizkoa

mehategiko lupetza

zakur deslaiak

langile urdinak

eta neskatilen matrailak ere

© Joseba Sarrionandia