EPIGRAMAK

            I

atearen aitzinean baratza

baratz erein berria

euriaren esperoan bezala

halantxe espero zaitut maitea

            II

sortaldean eguzkia erditzen

belardi zabalen artetik

itzul dezakezu begirada

ilargiaren heriotza behatzeko

            III

orrien artetik lili zuriak

ekainean enarak aidean

eta odol tantak bailiran

gerezi gorriak

            IV

zure zain itsas hegian

ene bihotza izarrei buruz

uhainetan barrena abiatu guran

zure bihotza itsasontzia

            V

uneka orituz larrosa tipiak

aidean zintzilik euri tantak

amona sukalderantz sartzen

epeltzen ari laratzeko sua

            VI

uhainak gainezka lehertzen

itsasoan euria da orain

eta haizea buztirik heltzen da

lizarren aurpegietara

            VII

zitronaren margoa belardiek

baitere maiteleen begiak

bilutsiak bilutsia gozatzen

egunari aterik zabaldu gabe

            VIII

Alexandriako paper horituak

Oihan Beltzeko horbela eta

Coimbrako fadoak ekarri ditu

haizeak ene atariraino

© Joseba Sarrionandia