PARIS NESKAZAHARRA

Oi Paris, neskazahar zabala.

Abar lehortuak ditun hire adatsak,

hire begi lausotuetan eskegitzen dizkiten

sainduek guardasolak,

hire bularreko arrailduretara doazan lasai

hiltzera pinpilipausak,

hire altzoan entzun diten abioi handi guziek

lehen seaska kanta,

hire belaunetatik erortzen ditun suizidak,

hire gona azpian ezkutatu ditun

lurpeko mamu eta mozorroak.

Eta hire esku ahurretan biltzen dun

Europako nigar eta gernu guzia.

© Joseba Sarrionandia