EPIGRAMAK

            IX

malkoak hire masailean

elurra bezain zuriak

enara beltzaranak

Pigalleko aulkietan

            X

Lauren Bacall aitzinera heldu

zitzaionean Humprey Bogart.ek

atzera begiratu zuen

ea zer zuen gibelean uzten

            XI

bideak hutsik zireneko gauean

artizarra izan zinen ilunbetan

eta gero ezkutatu egin zinen

egunaren argi zurbilean

            XII

tigrearengana hurbildu

laztandu eta

kotoiezkoak ditu

hatzaparrak

            XIII

hurrutirantz abiatzerakoan

ibaira iaurti erretratuak

xarolezko oinetakoak

betaurrekoak eta sonbreirua

            XIV

odol usaina atzemaiten ahal da oraindik belatzean

banan bana esan ditzaket eroritakoen izenak

ez beza ukan engoitik gure herriak

heroe beharrik

            XV

Pariseko ostatuetan Raymonde genuen zain

zubietan pintore ohiak mozkorturik

eta etorbideko zuhaitz bakoitzean zintzilik

emakume nigarti baten gutun amultsua

            XVI

mara mara elurra agian kotoizkoa

my love my dear diska zaharretan

pintore kubistez beterik kaiak

lehoia pintzelak irensten ari

© Joseba Sarrionandia