ESTATUA ELBARRIAREN ISTORIOA

Itsasneska uretarik sortu

            itsasneska antzo sortu zen uretarik

            itsas hegiko arroka eta haizea bezain bilutsia,

            uhainak zangoetan hausten, zen ondartzara iritsi

            eta karriketan oihartzunik gabe zeharkatu hiria

harrobiko elezaharra

            mendiari buruz abiatu zen liraina eta askea

            gibelerat behatu gabe

            harrobiraino, harrobi handiraino,

            eta han marmorezko horman barnerat sartu

harrobiko marmore landua

            harginek ahantzirik zuten itsasneskaren elezaharra

            marmorea ateratzen eta lantzen ari

            eta itsasneska kausitu zuten marmore artean

            hura ere marmorea eta iada landua

estatua elbarria

            gero gerlak heldu eta besoak ebaki zizkioten

            eta odola saldoka isuri zuen zaurietarik

            eta gorpu odolustuen antzera geratu zen

            hona hemen oro zuria

© Joseba Sarrionandia