EPIGRAMAK

        XVII

arrabita eta kitararen doinuak

eman zituen eta irriak eta jauziak

nigar egin ohi da egun

haren hilobiaren ondoan

        XVIII

atera deitzen dute

ez da Edgar Allan Poe

baizik eta never more

errepikatzen duen belea

        XIX

estali egin zituen hareak

ondartzan zeutzan marmorezko soinak

ez dituzte engoitik

izuturen haurrak eta arrubioak

        XX

itsas zabaleko goiz barean

xalupa gorriak

oihalik gabe

arraunik ere ez

        XXI

itsas hegiko harearen azpian

dira ehortziak Egeoko bidaztien hezurrak

haien odola uhainetan galdu zen

haien harmak harkaitzetan herdoildu

        XXII

ereinoa eta kamamila

bilduren dira urtaro orotan

haren

hilobiaren inguruan

        XXIII

isuria den malkoa

agertzear dena

eta sortzen somatzen duzuna

tristuraren katea

        XXIV

Samuel datza ehortzirik sasi eta asunez

inguraturiko hilobi hestu honetan

iragan hadi gelditu gabe bidaztia

ez bait dik hilak hire otoitzen beharrik

© Joseba Sarrionandia