A MIDSUMMER NIGHT'S DREAM

Argi zaharren artean noa

karrika urdindutan barrena,

espaloietan aitzina noraezean,

saihetsean utzirik maho zimelak,

zelati hesietan katu gorriskak,

ibaian behera puskatan foto oriskak,

bidaia isilkarian lanbroa, kalez kale.

Hotsa aditzen dut gibelean,

norbaitek persekutatzen nau:

ohol zaharrak jauretxeen kontra,

hauts barea harrien gainean,

farolaren ondoan itzal bat,

eltxo ohilduak aulkietan,

gauaren hogenak oro ilunbetan eta

kaian uhainak, itsasoaren taupadak bezala.

Persekutatzen nauenaren deihadarra.

Itzuli egiten naiz eta

ene aurpegi herabea kausitzen dut

gibelean harriturik.

© Joseba Sarrionandia