ALBERTO CAEIRO-REN BISITA

                «I know not what/ tomorrow will bring»

                erran zuen Fernando Pessoa-k hil baino egun bat lehenago.

«—Egun enauzu neu etorri

Alberto Caeiro baino» erraiten zautan

Fernando Pessoak, eta mintzaira nahasiz

eta lokarrigabez irauten zuen solasa.

Eguzkiloreek bezala behatzen zituen

hormetan zelai urregorriztatuak

edota muino izarez estaliak

ene begi lausotuek pinturaren bat,

izpilua edo horma soila ikusten zuten lekuetan.

Natura ederra eta zaharra dela erraiten zuen,

artzainak ardiei begira bezala.

Eta gaua abaildu orduko

euria, eguzkia, ilargia eta etxe ataria aulkia

desiratu eta aldegiten zuen lasai

sonbreiruaren hegala altzatuz.

© Joseba Sarrionandia