EPIGRAMAK

            XXV

Lisboako emegaldu zabalak

maitatzen baino etsitzenago

Lisboako hotel zaharrak

gauak bezain merkeak

            XXVI

bihar agian alferrik bilatuko zaitu

ilargiak lur gainean

gaur da tenorea haren argipean eseritzeko

whiski botila eskuetan

            XVII

norbait aisa harrapatzeko

bildu zaizkizu masailera

irriak eta malkoak

sare berbereko hariak bailiren

            XVIII

itsasontziak ozeanotan bezala

gure ametsetan istorioak

eta paper ondartza hauetan

gure itsasgalera guzietako hondakinak

            XXIX

ohantzeko goiz minean

goiztiria lausotzean

berregin ohi da

arnas hestuen kadena

            XXX

ene azpian da Jean ehortzia

haren hilarria naiz

haren izena darakusat

eta lur guti da bion artean

            XXXI

San Simon eta Judaetan

ontziak ankoretan

herio araun iduri

hegal gorriak bait ditu itsasoak

            XXXII

bakardadea itsaso zabalean

kalatxori bat soilik

ontzigalera ikusi zuen berbera

uhain bareen gainean

© Joseba Sarrionandia