EGUBERRIAK

Egutegi berria eskegi dut horman

zaharren arrastoen gainean.

Goizalde honetan badakit ez dela deus berririk helduko

urteen ber nekadura eta ber bizimodua salbu.

Badakit oraindik ere lehertuko direla bihotzak

zamaren zamaz, odolustuko direla gerlariak eta

hiltzeko xokoren bila noragabetuko direla animalia eriak.

Badakit oraindik ere iaurtiko dituztela esku dardartiek daduak,

etorkizuna iraganean dela jakinaren gainean.

Badakit haigun urtean ere gaur bezala

dudala egutegi berria zaharraren gainean eskegiren,

haigun urtean gaur bezala behatuko dudala

egunsentia argitzen hiri mortua

eta biztanle bere buruaz harroak.

Goizaldeon bezala dut haigun urtean ere

eguratsa beti bezala argitzen ikusiko eta

begirada barrura itzulirik ikusiko ditut

errautsak suaren lekuan eta, halaber,

bezperan elurtzan bildurikako enbor hezeak.

Goizaldeon bezala oro haigun goizaldean ere.

Ezer berririk ote dakar egun berriak?

Ez. Baina igurikatu eginen dut.

Heriotza ezer ez dela frogatzeko baino ez bada ere.

© Joseba Sarrionandia