EPIGRAMAK

            XLI

isiltasuna hedatu da hiri zaharrean

aintzina hertsi ziren ostatuetako ateak

hautsa bihurtu dira gure hilarrietan utzitako liliak

hautsa gara halaber geu ere

            XLII

elezaharren eremuetako bakardadetik

itzuli ninduzun zeu laztantzera

oskorrian oreinak ehiztariengandik bezala

ihesi zure begiak eneengandik

            XLIII

nigar anpuluak masailean behera

mihia ateratzen duzu zaporea dastatzeko

gezala da benetan

eta nigarrez segitzen duzu

            XLIV

zuhaitzez beterik karrika

zuhaitz bakoitzaren ondoan emakume bat

emakume guziak nigarrez

begiak erortzen malkoetarik

            XLV

bidaztien antzera

iragan zen eguzkia

elurtza amaigabean

haztarnarik utzi gabe

            XLVI

begira sortaldera

han da Franz ehortzia

haren errautsetan hasten dira

iluntzeak gristatzen

            XLVII

hiria emakume bat soilik

emakumea aurpegi bat soilik

aurpegia gardena

dizdira batek soilik zeharkatua

            XLVIII

korrika abiatu naiz etxerantz

karrika bustietan barrena

izpiluan ene begia

iadanik hertsiak ikusten ditudala

© Joseba Sarrionandia