HONA HEMEN

Philon, Gehon, Tigris eta Euphrates

ibaien lurraldean

utzi genuen gure guzia.

«Utz ezak etxean —erran zaukun aitak partitzean—

itsasgalera batetan galdu ahal den oro,

eraman itsasgaleran salbagarria datekena soilik».

Eta geure buruak hartu genituen zama bakartzat,

eta hona hemen

urak ekarri gaitueneko ondartza gorrian

—basamortuaren atarian— bilutsik,

ez basaranik, ez ezki itzalik,

ez urbelarrik ahora eramateko.

Noraezean iragaiten ditugu oskarbiak —sugarrezko erresumak—

hurruneko zaunkak entzunez,

erroien luma beltzei begira,

harri artean ezkutatzen diren sugelandarak atzeman ezinez,

eta gauetan —berunezko gau luzeetan—

huntza ikustezinen ehizan

edo balizko itzulbideren baten bila.

© Joseba Sarrionandia