ETXE ZAHARREKO ARMIARMA

Eguzkia —arratsaldearen arreba amultsua—

leihoan barnerat sartzen da

urrezko errainu unatuez.

Hautsa aidean zintzilikatzen da hala

nola pausatzen den erloju zaharraren orratzetan

eta izpilu aspaldidanik hutsean.

Iadanik ez pinpilipausarik hegan

ez geriza ondu berririk azpilean

ez irri zabalik besaulkian eserita.

Aintzinako solasen bat atzeman nahiz

itzuli naiz gaztaroko etxera. Erraturik,

ez gaztaroka. Tantoka pareterlojuaren hotsa.

Panpina elbarri bat gela bazterrean. Han,

armiarma bat zanpatzen dut atzamarretan,

eta atarira abiatzen naiz, atea hersteko.

© Joseba Sarrionandia