Miel-Otxinek illunabarretik

kantatzen:

               Etorri naiz

               bizitu naiz,

               egia da

               bizitza deritzan amets honetan

               egon naizela

                                     eta

               ikusi ditut jendeak

               ikasi gauzak

               ezagutu herriak

               dastatu dut amodioa

               senditu bihotzean kilika

               begietan malkoa

               ahoan mikatza

               bihotzean korapilloa

                                     eta

               sakonki, errotik

               bizitzaren adierazpen bizigarriek

               naute bizierazi,

               amets honek pena balio zuela

               sendituerazi,

               bai eta sakonki, errotik

               eriotzaren adierazpen hilgarriek

               naute hilerazi

                                     eta

               eriotza

               ezereza

               arnasa autsia

               sendituerazi.

               Oi bizitza!

               amets lilluragarria

               iduzki dirdiranta,

               zer zara?

               zure oroitzapena non gordetuko da?

               Bizitza

               goizeko ihintza,

               dizut egun kantatzen

               gizadiaren zintzurrean

               ahoan

               bihotzean.