Hemen heldu gara

kondairaren barrena bidez bide

itsasoaren gainetik egaka

urratsez urrats

illunabarretik illunabarrera

gorri, orlegi, eta ñabar

hemen heldu gara

trumilka eta bakarka

etxerik ezaren semeok

asekaiztasunaren alabak

Mendez mendeko uztaren emaitzak

sabaian ditugu gorderik

pipiak janak

itaxurez josiak,

ai, kondairaren karriketan galdutako arnasa!

Bitartean,

euriak laztantzen ditu

gure bizkar penatuak,

Brahms entzuten dugu

iturri agortuaren ondoko mugarrian jarriak,

triki-trixa dastatzen

gure herriko arkupeetan,

amodioa urrupatzen

itsas-ertz lanbrotsuetan

zehar-bide galduetan...

Hemen heldu gara

oinez

illunabarretik egunsentira bidaiatzen

bidez bide kontu kontari.