GOIZ-ARGI, ONGI ETORRI!

Jaiki, mutillak, jaiki,

baidator Goiz-Argi,

eta etxeko ate

leioak edegi,

pozik artu dagigun

argi eder ori,

biotzez emonagaz

geure ongi etorri.

Ai, ze pozik gagozan

geure Goiz-Argi'gaz,

baserritarrentzako

daukazen gauzakaz!

Asko ikasi geinke

berau artuagaz,

eta polito bizi

irabaziakaz.

Beti dago negarrez

gure auzoko Patxi,

esaten baserrian

ezin dala bizi;

beti lanian eta

poltsan diru gitxi,

oba dabela bere

baserria itxi.

Patxi, jakin nai bozu

baserria ibilten,

artu Goiz-Argi eta

asi irakurten;

onek diñozan danak

badozuz egiten,

laster asiko zara

polito biziten.

Ez egik artu, Patxi,

kalerako ames,

zuk dozun baserrian

bizi leike errez;

len be kaleratuak

asko dauz tamalez,

lengo baserriari

begira negarrez.

Neguan gabiz, Patxi,

geure ganbaretan

artoak zurituaz,

ipoiñak kontetan;

Goiz Argi irakurri

lan-bitartietan,

buruz jokatuteko

baserri-lanetan.

Agur dagitzut geure

pozezko Goiz-Argi,

Arantzazuko Amak

ondo zaindu bedi;

baserritarrentzako

on asko ekarri,

batez be gure euskaldun

baserritxuari.

                        (Ariatzan, 1959/XII/26)

© Balendin Enbeita