BIZKAIKO GURE MENDIAK

Gorbea, Anboto, Oiz, Illuntzar,

Sollube eta Bizkargi,

Bizkaigane ta Ganekogorta,

Sabigain ta Pagasarri;

euren artean zenbatu-ala

ainbat eratako mendi,

Bizkaiak mendiz apainduriko

gaztelu zar bat dirudi.

Mendi gañetik ikusten dira

aran, baso ta zelaiak,

uri, baserri, lugintza eder,

errekak eta ibaiak;

zoragarrizko abestietan

txiroliroka txoriak,

benetan dira atsegingarri

Bizkaiko gure mendiak.

Mendi goietan Kurutza Deuna,

ermitatxuak ugari,

egunsentiko argia Jaunak

lenen damotse eurari.

Asaba zarrak jarriak dira

siñismenen ezaugarri,

zer ikasia damoskularik

beian bizi garanori.

Mendi gañeko bake-bizitzaz

ondo ausnartzen badogu,

beian ez dogun arako zerbait

mendian izango dogu.

Euskera zarrak mendian dauka

lenengo bere jarleku,

mendi-zaleak izan gaitezan

garbi nai bogu jokatu.

                        (Karmel, 1960)

© Balendin Enbeita