SOLLUBE

                        «Bigarren doñuz»

           I Bizkai! Ire mendi eder Sollube,

           arrantzaleen zaindari,

           oiñazpietan etzanda dikan geure

           itxas arro Kantauri,

           gaur ire begien aurre nola ager

           sutxinpartan dagola?

           Lau aldetatik, lau ibai gorri lez,

           odola dariola!

           Sollube izan Bilbo'rako giltza,

           ta arrotzak aren atze dabiltza.

           Gudariak ez nai mendia utzi;

           narrutsik, etzanda, ekin, eutsi!

           Arrotza gora igo sei aldiz

           ta goiti-bera yaurti berriz!

           Orain igo diranak gora

           tontorretik doaz itxasora!

           Ortzi gorrian txori beltz etsai...

           Aiek euskal umeak erre nai.

           Zugaitz adarretan zintzilizka

           gorputz gazte, buru, beso ta anka!

           Gudarien euskal ikurrin

           sutan zegola mendi erdin,

           mutillak inguruan yarri

           ta ari begira il ziran kantari!

Erriak Dantza ta Guda mendi goietan...

           Aupa mutillak! Aurrera!

           Bakea baitegu biotzetan,

           ez degu iltzeko beldurra!

           Euskalerri'ko mutil gazteak,

           —Aingeru, naiz ta Gudari—

           gorroto gabe yausiak dira

           mendigoietan kantari!

© Telesforo Monzon