Amuriza, Xabier

Bertsolari eta idazle bizkaitarra (Zornotza, 1941). Eliz agintarien eta erregimen frankistaren aurka aritzeagatik kartzelan egon zen (1969-76). Euskaltzaindiak antolatutako txapelketetako epai-mahaikide zelarik bertsolari zorrotz eta berritzaile agertu zen. Bertsolaritzak izan duen gorakada, hein batean Amurizari zor zaio; bertso-eskolen aitzindari eta sustatzailea izan da. Euskal Herriko Bertsolari-txapelketa Nagusia 1979 eta 1982an irabazi du. Idazle oparoa da: Hil ala bizi (1973), Emea (1985) eta Oromenderrieta (1984) nobelak, euskara ikasteko irakurgaiak (Euskara bizia, 1978; Oinarriak, 1987), Aldous Huxley-ren Bai mundu barria itzulpena eta bertso-liburuak (Bertsolaritza. 1. eta Bertsolaritza. 2., 1981; Larehun herri. Mila bertso berri, 1982; Bizkaieraz bertsotan; 1996). Euskaltzain urgazlea da.